Мэдээний төрөл: Хууль, эрх зүй

Хууль, эрх зүйн мэдээний товъёог:

• УИХ-аас 2013.5.24-ний өдөр баталсан Засгийн газрын тусгай сангийн тухай хуульд нэмэлт оруулах тухай хуулийг танилцуулж байна.
• “Татварын мэргэшсэн зөвлөхөд эрх олгох, сунгах, шалгалт авах журам” батлах тухай Сангийн сайдын 120 тоот тушаал батлагдлаа.
• ЗГ-аас Аймаг, нийслэлийн иргэдийн Төлөөлөгчдийн Хурлын саналыг үндэслэн 2013 онд иргэнд өмчлүүлэх газрын нийт хэмжээ, байршил, зориулалтыг батлах тухай 179 тоот тогтоолыг батлан гаргажээ.
• Мөрдөх албаны тухай хуулийн төсөл болон уг хуулийн төсөлтэй холбогдуулан зарим хуульд нэмэлт, өөрчлөлт оруулах тухай хуулийн төслүүдийг ЗГ-ын хуралдаанаар хэлэлцээд, УИХ-д өргөн мэдүүлэхээр шийдвэрлэсний дагуу Хууль зүйн сайд Х.Тэмүүжин УИХ-ын дарга З.Энхболдод 2013.5.31-ний өдөр өргөн барив.
• 2013.6.3-6.4-ний өдрүүдэд УИХ дахь Намын бүлэг болон Ажлын хэсэг, Байнгын хорооны хуралдаанаар хэлэлцэх асуудлуудыг танилцуулж байна.
• Уул уурхайн сайд Д.Ганхуяг “Төрөөс эрдэс баялгийн салбарт баримтлах бодлого” батлах тухай УИХ-ын тогтоолын, Гаалийн болон нэмэгдсэн өртгийн албан татвараас чөлөөлөх тухай хуулийн, “Тодорхой ордыг стратегийн ач холбогдол бүхий ашигт малтмалын ордод хамааруулах тухай” УИХ-ын тогтоолын хавсралтуудад нэмэлт, өөрчлөлт оруулах тухай тогтоолын төслүүдийг УИХ-д өргөн барилаа.
• Засгийн газрын ээлжит хуралдаанаар Орон сууцны зээлийн ерөнхий журмыг баталлаа.
• 2013.4.30-ны өдөр УБ хотод гарын үсэг зурсан “Түншлэл, хамтын ажиллагааны тухай Монгол улс, Европын холбооны хоорондын хэлэпцээр"-ийг хэлэлцэн баталлаа.
• Өмнөговь болон Өвөрхангай аймгийн шүүхүүд Шүүхийн тухай багц хуулийг сурталчлах ажлын хүрээнд сургалт явууллаа.
• Ашигт малтмалын газрын Геологийн албаны эрдэс баялаг судалгааны тасгаас гаргасан ашигт малтмалын нөөцийн талаарх мэдээллийг танилцуулж байна.
• Манай улсын алтны экспорт он гарснаас хойш 85 хувиар өссөн үзүүлэлттэй гарлаа.

 

Эх сурвалж: Легас ХХК, Эрх зүйн мэдээллийн алба
www.legas.mn

 
Мэдээний төрөл: Хууль, эрх зүй

“Прокурорын байгууллагын бүтэц, зохион байгуулалт, цалингийн санг тогтоох тухай” тогтоолын хавсралтад өөрчлөлт оруулах тухай УИХ-ын тогтоолын танилцуулга

alt

 

УИХ-аас 2013.5.23-ны өдөр “Прокурорын байгууллагын бүтэц, зохион байгуулалт, цалингийн санг тогтоох тухай” тогтоолын хавсралтад өөрчлөлт оруулах тухай 38 тоот тогтоолыг баталсан бөгөөд уг тогтоолоор УИХ-ын 1993.7.9-ний өдрийн “Прокурорын байгууллагын бүтэц, зохион байгуулалт, цалингийн санг тогтоох тухай” 59 тоот тогтоолоор (2 дугаар хавсралт) батлагдсан есөн дүүргийн прокурорын газрын зохион байгуулалтыг нэгтгэж, дараах байдлаар өөрчлөн байгуулахаар тусгажээ.

Үүнд:

Гурав.Дүүргийн прокурорын газар

1

Дүүргийн 1 дүгээр прокурорын газар

Баянзүрх дүүрэг

Нийслэлийн Баянзүрх /Гачуурт/, Сүхбаатар, Чингэлтэй дүүрэг

2

Дүүргийн 2 дугаар прокурорын газар

Сонгинохайрхан

дүүрэг

Нийслэлийн Баянгол, Хан-Уул, Сонгинохайрхан /Жаргалант/ дүүрэг

3

Дүүргийн 3 дугаар прокурорын газар

Багануур дүүрэг

Нийслэлийн Багануур дүүрэг болон Төв аймгийн Мөнгөнморьт, Баяндэлгэр сумд, Хэнтий аймгийн Цэнхэр-Мандал сум

4

Дүүргийн 4 дүгээр прокурорын газар

Налайх дүүрэг

Нийслэлийн Налайх, Багахангай дүүрэг болон Төв аймгийн Баян, Баянжаргалан, Эрдэнэ сумд

Прокурорын байгууллагын тухай хуулийн 8 дугаар зүйлийн 8.2 дахь хэсэгт “Прокурорын газрыг ажлын шаардлага, хүн ам, нутаг дэвсгэрийн байдлыг харгалзан УИХ байгуулна” гэж заасны дагуу УИХ-аас дүүргийн Прокурорын газруудын харьяаллыг дээрх тогтоолоор өөрчлөн байгуулсан байх бөгөөд энэ нь Хууль зүйн салбарын шинэчлэлийн хүрээнд хийгдэж буй ихээхэн ач холбогдолтой өөрчлөлт болж байна. Энэхүү өөрчлөлтийг хийснээр эдгээр байгууллагын орон тоо, цалингийн санд өөрчлөлт орж, нэмэлт зардал гарахгүй бөгөөд уг тогтоол 2013.11.1-ний өдрөөс эхлэн хүчин төгөлдөр болж, даган мөрдөгдөх юм.

 

Эх сурвалж: Легас ХХК, Эрх зүйн мэдээллийн алба
www.legas.mn

 
Мэдээний төрөл: Хууль, эрх зүй

Засгийн газрын үнэт цаасны хоёрдогч захын анхны арилжааг зохион байгууллаа

alt

Сангийн сайд, Монголбанкны Ерөнхийлөгч, Санхүүгийн зохицуулах хорооны даргын 2013.5.21-ний өдрийн 111/A-105/13 тоот хамтарсан тушаалаар батлагдсан “Засгийн газрын үнэт цаасыг хоёрдогч зах зээлд арилжих журам”-ын хүрээнд 2013.5.30-ны өдөр Монголбанкаар дамжуулан Засгийн газрын үнэт цаасны (ЗГҮЦ) хоёрдогч захын анхны арилжааг амжилттай зохион байгууллаа.

Энэхүү арилжаагаар нийт 25.0 тэрбум төгрөгийн ЗГҮЦ арилжаалагдсан бөгөөд уг хоёрдогч зах зээлийн арилжаа явагдаж эхэлснээр хөрөнгийн зах зээл дээр хөрвөх чадвар өндөртэй, эрсдэл багатай хөрөнгө оруулалтын хэрэгсэл бий болох, үндэсний мөнгөн тэмдэгт төгрөгийн жишиг, өгөөжийн муруй бүрэлдэх зэрэг чухал ач холбогдолтой юм.

 

Эх сурвалж: Легас ХХК, Эрх зүйн мэдээллийн алба
http://www.legas.mn/web/

 
Мэдээний төрөл: Хууль, эрх зүй

“Гадаадын зарим улсад Монгол улсын Дипломат төлөөлөгчийн газар шинээр нээх тухай” УИХ-ын тогтоолын төслийг УИХ-д өргөн барив

alt

УИХ-ын гишүүн, Гадаад хэргийн сайд Л.Болд 2013.5.30-ны өдөр “Гадаадын зарим улсад Монгол улсын Дипломат төлөөлөгчийн газар шинээр нээх тухай” УИХ-ын тогтоолын төслийг УИХ-ын дарга З.Энхболдод өргөн барилаа.

Гадаад хэргийн сайд Л.Болд хэлэхдээ, МУ-ын гадаад бодлогын үзэл баримтлал, шинэчлэлийн ЗГ-ын гадаад харилцааны зорилтууд, гадаад харилцааг эдийн засагжуулах хөтөлбөрийг хэрэгжүүлэх зорилгоор гадаадын зарим улсад Дипломат төлөөлөгчийн газар шинээр нээн ажиллуулах асуудлыг УИХ-ын Аюулгүй байдал, гадаад бодлогын байнгын хороотой 2013.5.14-ний өдрийн хуралдаанаар зөвшилцөж, мөн 2013.5.25-ны өдрийн ЗГ-ын хуралдаанаар хэлэлцэн шийдвэрлэсний дагуу ийнхүү УИХ-д өргөн мэдүүлж байна.” гэлээ.

Шинээр нээх Дипломат төлөөлөгчийн газруудын байршлыг сонгохдоо Гадаад бодлогын үзэл баримтлалын тэргүүлэх чиглэл, тухайн улсын олон улсын хамтын нийгэмлэг болон бүс нутаг дахь нэр хүнд, жин нөлөө, худалдааны эргэлт, эдийн засгийн харилцаа, тухайн улсад оршин сууж буй Монгол иргэд болон харилцан зорчиж буй иргэдийн тоо, манай улс дахь бодит ашиг сонирхол зэргийг харгалзан үзэж тогтоолын төслийг боловсруулжээ.

 

Эх сурвалж: Легас ХХК, Эрх зүйн мэдээллийн алба
http://www.legas.mn/web/

 

 


Мэдээний төрөл: Хууль, эрх зүй

Эдийн засгийн бодлого, өрсөлдөх чадварын судалгааны төвөөс Судлаачдын ээлжит уулзалтыг зохион байгууллаа

alt

Эдийн засгийн бодлого, өрсөлдөх чадварын судалгааны төвөөс /ЭЗБӨЧСТ/ Судлаачдын ээлжит уулзалтыг 2013.5.29-нйи өдөр Хууль зүйн үндэсний хүрээлэнд зохион байгуулсан бөгөөд төр, ТББ, хувийн хэвшлийн 20 орчим байгууллагын төлөөлөл оролцлоо.

Уг уулзалтын үеэр Стратеги судалгааны хүрээлэн, Хөдөлмөрийн судалгааны институт, Сант марал сан, Гамшиг судлалын хүрээлэн, УИХ-ын судалгаа, шинжилгээний хэлтэс, Санхүү, эдийн засгийн дээд сургуулийн төлөөллүүд өөрсдийн байгууллага, үйл ажиллагааны талаар танилцуулж, судалгааны байгууллага хоорондын хамтын ажиллагааг хэрхэн сайжруулах талаар санал бодлоо хуваалцсан юм. Мөн уулзалтаар судалгааны байгууллагууд, судлаачдад хэрэгтэй мэдээллүүдийг нэгтгэж, мэдээллийн сан бий болгох ажлыг яаралтай эхлүүлэх тал дээр оролцогчид санал нэгдлээ.

Ийнхүү ЭЗБӨЧСТ-ийн ерөнхий захирлын үүрэг гүйцэтгэгч Б.Лакшми хурлыг хааж үг хэлэхдээ, дараагийн уулзалт зургадугаар сарын сүүлчийн долоо хоногт болохыг мэдэгдээд, тэр үеэр оролцогчид зөвхөн байгууллага биш, тодорхой судалгааныхаа талаар танилцуулж, мэдээлэл авах, санал солилцох боломжтойг тэмдэглэв.

 

Эх сурвалж: Легас ХХК, Эрх зүйн мэдээллийн алба
http://www.legas.mn/web/

 

 


Мэдээний төрөл: Хууль, эрх зүй

Ойн тухай хуульд нэмэлт, өөрчлөлт оруулах тухай хуулийн төсөл өргөн барилаа

alt

УИХ-ын гишүүн Л.Энх-Амгалан болон нэр бүхий гишүүдийн зүгээс 2013.5.30-ны өдөр “Ойн тухай” хуульд нэмэлт, өөрчлөлт оруулах тухай хуулийн төслийг УИХ-ын дарга З.Энхболдод өргөн барилаа.

Уур амьсгалын өөрчлөлт бодитой нөлөөлж байгаа өнөө үед экосистемийг зохицуулагч түлхүүр зүйл болох ойн нөөцийг хамгаалах, түүнийг нөхөн сэргээх асуудалд дэлхий нийтээрээ онцгойлон анхаарал хандуулж байна. Энэ нөхцөл байдалтай шууд холбоотойгоор экологийн эмзэг нөхцөлд оршдог Монгол орны хувьд ойг хамгаалах асуудал бол тэргүүлэх ач холбогдолтой гэж үзэн, ойг хамгаалах талаар иргэд, байгаль хамгаалагчийн эрх, үүрэг хариуцлагыг сайжруулахад чиглэсэн “Ойн тухай” хуульд нэмэлт, өөрчлөлт оруулах тухай хуулийн төслийг ийнхүү санаачлан боловсруулжээ.

Хуулийн төслийг Монгол орны ойн нөөцийн 1/3 хувийг агуулж байдаг Хөвсгөл нутгийн иргэд, ойн мэргэжлийн байгууллага, хамт олон болон байгаль орчны төрийн бус байгууллагаар хэлэлцүүлж, тэдний саналыг төсөлд тусгасан бөгөөд "хууль батлагдсанаар ойн талаар төрөөс баримтлах шинэчилсэн бодлого хуульд тусгагдаж, ойг хамгаалах, зүй зохистой ашиглах, нөхөн сэргээх, үржүүлэх ажлын эрх зүйн орчин боловсронгуй болохоос гадна ой хээрийн түймрээс урьдчилан сэргийлэх, хамгаалах ажлын үр өгөөж, чанар эрс дээшилж, төрийн байгууллагуудын ажлын зааг ялгаа, эрх үүрэг тодорхой болж өмнө хоёр тусдаа байсан хуулийн давхардал хийдэл, зөрчил арилж улмаар хуулийн чанар хүртээмж сайжирна" гэж хууль санаачлагчид үзэж байна.

 

Эх сурвалж: Легас ХХК, Эрх зүйн мэдээллийн алба
http://www.legas.mn/web/

 

 


Мэдээний төрөл: Хууль, эрх зүй

УИХ-ын хаврын ээлжит чуулганы 2013.5.31-ний өдрийн нэгдсэн хуралдаанаар хэлэлцэх асуудлыг танилцуулж байна

alt

УИХ-ын чуулганы 2013.5.31-ний өдрийн 09.00 цагаас эхэлж буй хуралдаанаар Мөнгө угаах болон терроризмыг санхүүжүүлэхтэй тэмцэх тухай хуулийн шинэчилсэн найруулгын төсөл, Хуулийн этгээдийн улсын бүртгэлийн тухай хуульд нэмэлт оруулах тухай, Терроризмтэй тэмцэх тухай хуульд нэмэлт, өөрчлөлт оруулах тухай, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд өөрчлөлт оруулах тухай, Мөнгө угаах болон терроризмыг санхүүжүүлэхтэй тэмцэх тухай хууль хүчингүй болсонд тооцох тухай хуулийн төслүүдийн Хууль зүйн байнгын хорооны санал, дүгнэлтийг УИХ-ын гишүүн Ж.Батзандан танилцуулж, эцсийн хэлэлцүүлгийг хийх, Үнэт цаасны зах зээлийн тухай хуулийн шинэчилсэн найруулга, Аж ахуйн нэгжийн орлогын албан татварын тухай хуульд өөрчлөлт оруулах тухай, Хувь хүний орлогын албан татварын тухай хуульд өөрчлөлт оруулах тухай, Хөдөө аж ахуйн гаралтай бараа, түүхий эдийн биржийн тухай хуульд өөрчлөлт оруулах тухай, Зар сурталчилгааны тухай хуульд нэмэлт, өөрчлөлт оруулах тухай, Даатгалын тухай хуульд өөрчлөлт оруулах тухай, Санхүүгийн зохицуулах хорооны эрх зүйн байдлын тухай хуульд нэмэлт, өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуульд өөрчлөлт оруулах тухай, Үнэт цаасны зах зээлийн тухай хууль хүчингүй болсонд тооцох тухай хуулиудын эцсийн найруулгыг сонсох бөгөөд мөн “Үнэт цаасны зах зээлийн тухай хууль батлагдсантай холбогдуулан авах зарим арга хэмжээний тухай” УИХ-ын тогтоолын эцсийн найруулгыг сонсоно. Харин үдээс хойш буюу 14.00 цагаас эхлэх хуралдаанаар Барилга, хот байгуулалтын салбарын бүтээн байгуулалтын талаар МУ-ын Ерөнхий сайдын мэдээлэл хийх юм.

 

Эх сурвалж: Легас ХХК, Эрх зүйн мэдээллийн алба
www.legas.mn

 

 


Мэдээний төрөл: Хууль, эрх зүй

Эдийн засгийн хөгжлийн сайд Н.Батбаяр Тавантолгой ХК, Эрдэнэс Тавантолгой ТӨК, Энержи Ресурс ХХК-ийн бүтээн байгуулалтын ажилтай танилцлаа

alt

УИХ-ын гишүүн Н.Батбаяр, Б.Гарамгайбаатар, Д.Зоригт, С.Бямбацогт нарын төлөөлөгчид 2013.5.29-ний өдөр Өмнөговь аймагт ажиллаж, Тавантолгойн коксжих нүүрсний сав газарт үйл ажиллагаа явуулж буй Тавантолгой ХК, Эрдэнэс Тавантолгой ТӨК, мөн Энержи Ресурс ХХК-ийн бүтээн байгуулалтын аж байдалтай танилцлаа.
Тэд эхлээд Тавантолгой ХК-ийн уурхайн бүтээн байгуулалтын үйл ажиллагаатай танилцсан бөгөөд тус компанийн ажилтнуудын мэдээлснээр, нүүрснийн зах зээл уналттай, бүтээгдэхүүний үнэ бага байгаа ч Тавантолгойн уурхай нь ашиглалтын зардлаа харьцангуй бага байлгаж, борлуулалтаа үргэлжлүүлж, уурхайн аман дээрээс гэрээт худалдан авагчдадаа нэг тонн коксжих нүүрсийг 44 мянган төгрөгөөр зарж байгаа юм байна. Үүний дараа Эрдэнэс Тавантолгой ТӨК-ийн эзэмшил дэх Зүүн болон Баруун Цанхийн уурхайн ажилтай танилцаж, 2011 оноос бүтээгдэхүүнээ урд хөршид экспортлож эхэлсэн, одоогоор нийт 3,5 сая орчим тонн коксжих нүүрсийг БНХАУ-ын Чалко компанитай байгуулсан гэрээний дагуу нийлүүлээд байгаа талаар тус компанийн удирдлагуудын танилцуулсан мэдээллийг сонслоо.
Түүнчлэн Энержи Ресурс компанийн Ухаа худаг уурхай, тус компанийн барьж байгуулсан нүүрс баяжуулах үйлдвэр болон жилд 1-МВт-ын хүчин чадалтай цахилгаан станцтай танилцсан ба компанийн ажилтнуудын хэлснээр, 10 орчим долларын нэмүү өртөг үүсгэж байгаа нь бүтээгдэхүүнээ илүү өндөр үнээр борлуулах боломжтой болгож байгаа аж. Гэвч одоогийн байдлаар тээвэрлэлтийн зардал асар өндөр тул энэ асуудлыг төмөр зам барьж нэг мөсөн шийдэрлэх хэрэгтэй талаар дурдлаа. 

 

Эх сурвалж: Легас ХХК, Эрх зүйн мэдээллийн алба
www.legas.mn

 

 


Мэдээний төрөл: Хууль, эрх зүй

Гадаад валютын дуудлага худалдаа зохион байгуулагдлаа

alt

Монголбанкнаас долоо хоног бүрийн Мягмар, Пүрэв гарагуудад тогтмол зохион байгуулдаг гадаад валютын ээлжит дуудлага худалдаа 2013.5.30-ны өдөр явагдсан бөгөөд уг дуудлага худалдаагаар банкууд 8.5 сая ам.доллар, 47 сая юань худалдан авах мөн форвард хэлцлээр 100 сая ам.доллар худалдах санал тус тус ирүүлснээс Монголбанк форвард хэлцлээр 100 сая ам.доллар худалдаж, үлдсэн саналыг үл биелүүллээ.

Түүнчлэн эл өдөр банкуудаас валютын своп хэлцлээр 82 сая ам.доллар худалдан авах санал ирүүлсэн ба Монголбанк 80 сая ам.долларыг своп хэлцлээр худалдаж, валютын захад ам.доллар нийлүүлэв.

Дашрамд дурдахад, Монголбанк нь валютын дотоодын захад оролцогчдод аливаа мэдээллийг нээлттэй хүргэхийг дэмжиж ажилладаг бөгөөд энэхүү мэдээллийн эцсийн зорилго нь валютын захын тогтвортой байдал, төгрөгийн ханшийн огцом хэлбэлзлийг үүсгэхгүй байхад чиглэгддэг байна.

 

Эх сурвалж: Легас ХХК, Эрх зүйн мэдээллийн алба
www.legas.mn

 

 


Мэдээний төрөл: Хууль, эрх зүй

“Хүнсний түүхий эд, бүтээгдэхүүнийг татан авах, устгах, дахин боловсруулах журам” батлагдлаа

alt

ЗГ-аас 2013.5.18-ны өдөр шаардлага хангаагүй хүнсний түүхий эд, бүтээгдэхүүний талаар мэдээлэх, татан  авах, дахин боловсруулах, устгахтай холбоотой харилцааг зохицуулсан “Хүнсний түүхий эд, бүтээгдэхүүнийг татан авах, устгах, дахин боловсруулах журам”-ыг батлах тухай 172 тоот тогтоолыг батлан гаргасан бөгөөд уг журмын хавсралтаар Хүнсний түүхий эд, бүтээгдэхүүнийг татан авах үйл ажиллагааг бүртгэх, мэдээлэх маягтыг мөн баталжээ.

Түүнчлэн тогтоолыг  хэрэгжүүлэх талаар зохион байгуулалтын арга хэмжээ авч, хяналт тавьж ажиллахыг МУ-ын Шадар сайд Д.Тэрбишдагвад үүрэг болгосон байна.

 

Эх сурвалж: Легас ХХК, Эрх зүйн мэдээллийн алба
www.legas.mn

 

 


Site Visitors

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday67
mod_vvisit_counterYesterday656
mod_vvisit_counterThis week3706
mod_vvisit_counterLast week3904
mod_vvisit_counterThis month10081
mod_vvisit_counterLast month0
mod_vvisit_counterAll days10081

We have: 20 guests, 4 bots online
Your IP: 50.19.74.67
 , 
Today: Apr 20, 2014

Registering your email address will receive you a new message

Content on this page requires a newer version of Adobe Flash Player.

Get Adobe Flash player

Our business hours

Monday to Friday
8am - 5pm